اكيد عندك حد فى العيلة عنده حول
لو انته اب جديد او ام جديدة يبقى اكيد لاحظتى ان ابنك و هو صغير قبل السنة بيصيبو حول و فجاة اختفى الموضوع دة
طب متيجى نشوف معنى الحول
زى ما كلنا عارفين انه حالة من عدم التناسق بين العينين اثناء النظر
بمعنى تانى ان لو نظرت لحاجة قدامك تتجه واحدة فى اتجاه الشئ اللى انته ناظر اليه و التانية تبص للناحية اخرى ممكن تبص
للداخل - للخارج - نادر لما تلاقى عين فيها حول لفوق او لتحت
طيب خلينا نقول ايه اسبابه !!
دة بيكون ليه اسباب كتير جدا و انواع كتير هنتكلم ببساطة عنها
السبب الاساسى و هو بيكون ضعف او قوة فى واحدة او اكتر فى عضلات العين .. اه يا عم عضلات العين اصل العين بيتحكم فى توازنها و حركتها 6 عضلات
طيب ايه اللى بيسبب الضعف دة ادكتور
اللى بيسببه بيكون حاجة من اللى جايين
1- ممكن يكون عيب خلقى اصلا مولود به
2 - ممكن يحصل اصابه للعضلة او للعصب اللى بيغذيها فتسبب الحول
3 - اغلبية الاطفال اللى عندهم حول بتكون بسبب اصابة عند الولادة
4 - ممكن مثلا بسبب امراض لو تطورت الحالة زى التهابات العين مثلا او الجدرى او الحصبة
طيب تمام نعرف انواعه بقى !!
فى نوع بيكون دائم مع الشخص من اول ما يتولد لحد اما يموت و دة الحول الدائم
عندك نوع ساعة يروح و ساعة يجى يعنى متقطع
عندك حول بينتقل بين العينان و دة الحول المتبادل
سؤال بقى لو سمحت هو ايه علاج الحول دة ادوكتور
العلاج بيكون 1 - اما الشخص يلبس نظارة
2 - اما يقوم باجراء عملية يقوم فيها الدكتور بشد العضلة او يخفف من قوة شدها على حسب الحالة بحيث يعمل فى النهاية توازن بين العضلات
طب و العمليات دى خطر يا دكتور
هقولك نظرا لانها خارج العين ( يعنى العضلات اللى ماسكة العين من برة ) فهى مش خطر على النظر و لو حصل مشكلة يبقى بسبب تلوث حصل للجرح بعد العملية و علاجه سهل
اه صح نيجى للاطفال اللى اهلهم بيجو يجروا علينا فى الاشهر الاولى من الولادة و يقولو الواد عنده حول ادكتور !!
يا جماعة اتطمنوا الاطفال دون سن السنة بيكون عندهم خلل فى التوازن بتاع عينيهم .. كمان بيكون بسبب ان الطفال بيكون الجلد مغطى حوالين عينيهم فبتحس انه عنده حول بس خد بالك لو الموضوع زاد عن سنة و استمر معاه بعد السنة يبقى كدة فى مشكلة ولازم تروح للدكتور على طول
ملحووووووظة هامة : لو انته عندك الموضوع دة متتكسفش منه لان ربنا خلقك كدة و هيعوضك و هيجزيك خير عليه . مارس حياتك عادى متبديش اهتمام لحد بيبصلك بغرابة و خليك واثق من نفسك فى اى موقف
اللهم اشفى جميع امراض المسلمين
لو عجبك الموضوع لايك و شير
ليست هناك تعليقات:
إرسال تعليق